Tameɣrust d ugḍi
Mḥat Mḥidin si taddart n Iɣil Mimun yettwassen aṭas s temεiyin-is. Yiwet n tikkelt, idda d aqeffaf seg Iɣil Mimun, ruḥen, ad d-awin tislit seg yiwet n taddart deg At Yiraten. Dinna, mi kkren ad d-ruḥen ad d-uɣalen s axxam, eddan-d talemmast n useqqif n tejmat n taddart-nni Ilmeẓyen ssya u ssya, qqimen ɣef yideknan. Ttaḍṣan gar-asen, qqaren-asen-d: A tameɣrust i awen-d-nefka! A tameɣrust i awen-d-nefka! Yesla-asen Mḥat Mḥidin, izzi ɣer deffir ɣer-sen, yenna-asen: “ad tezrem agḍi i as-nhegga! Ad tezrem agḍi i as-nhegga!”
Yir meṭṭu
Yiwen wass, tekker yiwet tmeṭṭut, truḥ ad d-tawi times, ur tufi ara anda ad tt-id-terr. Amek ara texdem ? Truḥ, tekkes-d aqermud si tzeqqa, tewwi deg-s times. Dɣa Mḥet Mḥidin iwwi asefru fell-as, yenna-as : Yir meṭṭu yif-t beṭṭu Kker, i rwaḥ qbel dderya Mi tekker ad d-tawi times Tekkes aqermud si tzeqqa.
Ramdane Lasheb