Thegga-d ass n acer 20 ɣuct iɛeddan Tdukkla Agraw Tigawt Ilemẓiyen (Raj) yiwen n usarag akken ad d-tberreḥ s yigemmaḍ n uḥedqis (sondage) i tga gar 25 mayu d 15 yunyu, i lmend n tefranin tisaḍufanin yezrin. Asarag-a, i d-yellan deg tmaneɣt, yemmug-d sɣur uselway n tdukkla-a i d-nebder Mass Ɛebdelwahab Fersawi, akked Mass Ḥmed Helfawi, d amazzag deg uḥedqis n rray. Ɣef wawal-nsen, ilemẓiyen n tmurt n Lezzayer beɛden aṭas ɣef tsertit, am akken ɣunfan akk ikabaren isertanen. Amedya seg yigemmaḍ-nni, ad naf ala 19% n yilmeẓyen i kecmen deg walbaɛḍ n yikabaren deg tudert-nsen. Rnu ɣer-s iban-d d akken azal n 43% ur nettamen ikabaren d tigawt-nsen. Ma yella d wid ur d-nenni ayen yelhan ɣef yikabaren, yewweḍ leḥsab-nsen ɣer 30%. D ayen i d-yesbegginen s uwekked amek ɛuffen yilemẓiyen annar n tsertit. « Nekni nella nebɣa ad nẓer amek yettwali yilemẓi tasertit di tmurt. Dɣa neffeɣ ɣer unnar deg 41 n twilayin, anida nesteqsa azal n 1462 n yilmeẓyen n yal taggayt ». I aɣ-d-yenna uselway n tdukkla Raj, Mass Fersawi Abdelwahab, send ad d-yernu: « Ɣer taggara, iban-d d akken ilaq ɣef yimdebbren d yikabaren ad ɛiwden tamuɣli d tikli i tsertit-nsen. Aya d ayen i d-yettnebbihen s wayen n diri meskud ilmeẓyen ttbeɛɛiden ttahdan seg tsertit ».
M. K.