7 n yiɣrbazen deg Tubiret…
Tella-d tulya tunṣibt n 7 n yiɣerbazen deg lwilaya n Tubiret, taṣebḥit n wass-nni n larebɛa yezrin, i d-yellan d ass amenzu n tuɣalin n warrac ɣer leqraya. Gar sebɛa-agi n yiɣerbazen, llan setta deg-sen d iɣerbazen imenza. Sin seg-sen deg tɣiwant n Tubiret, tlata-nniḍen deg Ṣur Lɣezlan, wayeḍ deg Lexḍariya. Akked yiwet n tesnawit tamaynut deg tɣiwant n Meɛla, i d-yezgan tama n ugafa-amalu n lwilaya n Tubiret.
… Rebɛa-nniḍen deg Bgayet…
Deg wass amenzu n unekcum n yinelmaden ɣer tneɣriyin-nsen i useggas-agi aɣurbiz amaynut 2017/2018, ula deg lwilaya n Bgayet, yella-d uftaḥ n ukuẓ n yiɣerbazen ijdiden, i d-yernan aseggas-agi. Iɣerbazen-agi d wigi: sin n yiɣerbazen imenza ldin tiwwura-nsen i yinelmaden ass-nni n amhad iɛeddan lewhi n 07h30 n ssbaḥ, yiwen deg tɣiwant n Bgayet, wayeḍ deg tɣiwant n Amiẓur. Tella-d diɣ tulya n yiwen n uɣerbaz alemmas deg Tiniri, yetabaɛen ɣer ladayra n Ukfadu, akked tesnawit tajdidt deg tɣiwant n Tuja, deg ladayra n Leqsur. Am wakken daɣen i bnan azal n 32 n tzeɣwa n waddal akked wazal n 23 n yinurar n wurrar i lfayda n yinelmaden yeqqaren, ladɣa wid n uɣerbaz alemmas d wid n tesnawit.
… Deg Tizi Uzzu, llin tlata n yiɣerbazen
Ula deg lwilaya n Tizi Uzzu, llin kraḍ n yiɣerbazen-nniḍen tiwwura-nsen i yinelmaden ijdiden n useggas-agi. Yiwen deg-sen d aɣerbaz amenzu n tama n Uẓeffun, akked tririt n sin n yiɣerbazen-nniḍen ilemmasen d tisnawiyin .
Ghani Amazigh