Zemrent ad ḥulfunt tlawin n taddart deg Yiɣil Ɛli, i d-yezgan s wazal 95 n yikilumiṭren ɣer unẓul-amalu n Bgayet, d akken ayen yakk i d-yenneɣlen d ageffur ddurt-a yekfan, d tiririt kan n Unẓar ɣur-sent. Dɣa, deg wussan-nni n taɣart i yesḥeyyren afellaḥ d uremmas, ameqqran d umecṭuḥ, kkrent tlawin n temnaḍt-a i d-yefkan aṭas n yinaẓuren, grent ttrent Anẓar, ɛennant ɣur-s ad d-iruc akal yekkawen. S uheggi n tdukkla tilemẓit « Ssut n yidurar », i d-yennulfan iseggasen-a ineggura kan, yettunefk wazal i wansay-a aqbur, yettwasider-d s uḥḍar n yakk lɣaci n udrum. « Mazal neṭṭef nekni deg lɛada-a. Nwala kan liḥala n tegnewt teqqur, nenna ad nekker ad netter Anẓar ad d-teɣli lgerra ». D awal n yiwet n teḥdayt i yekkin deg uheggi. Deg unejmuɛ n waṭas n tlawin d warrac, ɛeddant merra tmekkiyin seg tiddiwin n tuttra n Unẓar. Akken s ccna s yiwet n taɣect n » Anẓar Anẓar, a Rebbi ssew-itt ar aẓar », tella-d tiɣri ɣef waṭas n yixxamen i usuter n wayen yettwaheggnen d tagella. Ilaq ad d-nini d akken ur mazal yeṭṭuqqet wansay-a ɣur leqbayel am zik. Simmal ttidiren deg zzman atrar, simmal berrun i wayen yeqqnen ɣer yidles d teflest-nsen (liman).
M. K.