Ulamma ɛeddan tura 7 n yiseggasen ɣef tmettant-is, maca mazal ṣṣut-is aḥlawan yessuzun imeẓuɣen, mazal tugna-s tressa deg wallaɣ n yimdanen, mazal imeslayen-is teddun-d deg wawal-nsen. Ihi xas sgunfu deg talwit a Ccix Cherif Kheddam. Ulamma teǧǧiḍ-aɣ ass n 26 deg yennayer 2012, maca teǧǧiḍ-d ageruj ur nfennu ama i taddart-ik ama i tmurt n Leqbayel. I lmend n usmekti-agi wis setta, thehha-d tenmehla n yidles n Tizi Uzzu, yiwen leqdic adelsan d amerkanti ɣef uneḍruy-agi. D tajmilt yeddan ɣef sin wussan, imi tebda ass-nni n lǧemɛa 26 deg yennayer 2018 s rwaḥ n ddeqs n yimdanen n yidles akked waṭas n yicennayen sersen tameqqunt n yijeǧǧigen ɣef uẓekka yellan deg taddart tanaṣlit Bumesɛud deg tama n Yimsuḥal, tin ɣur-s llant-d waṭas n tnagiyin sɣur kra n yicennayen d yimeddukkal-is. Ma d ass-nni n ssebt, 27 deg yennayer 2018, deg tzeqqa n temsikniyin n Uxxam n yidles Mulud Mɛemmri, llant-d waṭas n temsikniyin, gar-asent tinna n tesfifin-is tiqdimin d yimagraden n tɣamsa yettwarun ɣef tudert-is d leqdic n urgaz-agi ameqqran, tella-d daɣen tin n ttsawer-is akked tin n tmeddurt-is. Ma seg 14h00 n tmeddit, yella-d usiher neɣ tameɣa n ccna meqqren ideg ccnan ddeqs n yicennayen n tmurt.
A.A.