Ass-nni n lḥed 25 meɣres iɛeddan, i yebda ujerred n tudrin yebɣan ad ttekkint deg tezrigt tis setta n temsizzelt n tezdeg Aïssat Rabah.
Ma d ttiɛad aneggaru n ujerred yetturaǧu ad d-yili ass n letnayen 30 yebrir 2018. Timsizzelt-agi n taddart tazedgant, yettheggi-tt-id yal aseggas Useqqamu aɣerfan n lwilaya (APW) n Tizi Uzzu, ma d iswi-ines d acebbeḥ d usizdeg n tuddar n leqbayel. D asebɣes dɣa i tuddar i d-yettifriren di yal tazrigt, yerna tura tuɣal d ansay, ttemɛnadent tudrin fell-as. Tuddar yenwan ad ttekkint, ilaq fell-asent ad sersent zzmamat-nsent ɣer Useqqamu Aɣerfan n lwilaya, uqbel 30 yebrir i d-iteddun. Ma deg waggur n maggu d asawen, ad tebdu tufɣa ɣer tuddar ijerden iman-nsent, sɣur tesqamut yettwakelfen s twennaḍt d tezdeg akked tdawsa deg useqqamu-agi, i wakken ad ktazlen wa ad fernen ɣer sdat 10 n tuddar zeddigen i tezrigt-agi tis setta.
Amaynut n tezrigt-agi tis setta
Tazrigt-agi tis 6 n temsizzelt-agi n tezdeg, tewwi-d amaynut i useggas-agi n 2018, ideg ara tefk tesqamut n ufran 10 n warrazen, mačči 8 am useggas iɛeddan, Ad d-sqimen mraw-agi n warrazen s 44 imelyan n ddinar, mačči s 33 imelyan am useggas iɛeddan. Taddart ara yawin arraz amezwaru ad tawi 9 imelyan n yidinaren, tis snat ad tawi 7, tis tlata ad tawi 6, tis rebɛa ad tt-id-ṣahent 5, tis xemsa 4, ma d tin ara yawin arraz wis setta d wis sebɛa akked wis tmanya, ad awint yakk 3 i yal yiwet deg-sent. Ma d taddart ara yeṭṭfen amḍiq wis tesɛa akked wis mraw, ad awint 2 i yal yiwet. Ma d ilugan yessedduyen timsizzelt-agi, ad d-ilin akka-agi; snat-nni n tuddar ara yawin arraz wis 9 d wis 10, sɛant azref ad ttekkint deg tezrigt i d-iteddun, ma d tlata-nni n tuddar ara d-yifriren d timenza, ur sɛint ara lḥeqq ad ttekkint deg temsizzelt-agi alamma ɛeddan xemsa n yiseggasen. Ma d tudrin ara yeṭṭfen amkan wis 4 akked wis 5, ur sɛint ara azref n uttekki alamma zrin 3 n yiseggasen, ma d tuddar ara yeṭṭfen amḍiq wis 7 akked wis 8, sɛant lḥeqq ad kkint deg-s mi ɛeddan ɛamayen.
Amek ara d-yili uktazal n tezrigt-agi ?
Ma si tama n tfelwit n uktazal, ad d-yili usenqeḍ ɣef 100 tenqiḍin. 25 n tneqiḍin, rzant iberdan n taddart, 25 tneqiḍin-nniḍen n useddu n yiḍuman d wammus, ma d imeḍqan uzyizen (public), yecban tajmaɛt, imekwan n tizegzewt…atg ɣef 20 tneqiḍin, 10 tneqiḍin-tiyaḍ i tliwa d yiɣbula n waman. Ma d imeḍqan n yidles d tmussni akked yisebdaden ɣef 10 tneqiḍin, timqebrin s 7 tneqiḍin, ma d tlata-nni i d-yeqqimen i leqwanen n useḥbiber ɣef twennaḍt. Ɣer taggara maḍi, ad d-nesmekti belli tazrigt n useggas yezrin, d taddart n Tiferdoud i yewwin arraz amezwaru, ma d tinna uqbel-is d taddart n Boumessoud i tt-yewwin d tamezwarut deg 2016.
G. A.