Ussan-a yezrin, usan-d kra n yisallen i yesferḥen iselmaden imaynuten n useggas aɣurbiz 2017/2018, i d-yewwin
amsizwer n usɣer, llan deg wumuɣ n uraǧu (liste d’attente). Ɣas ma aṭas i isebren, qqimen acḥal war axeddim, yelḥeq-d wass deg i asen-tessawel tenmehla n usegmi n twilayt n Bgayet akken yal yiwen, ad yeṭṭef amḍiq-is deg rebɛa n tɣemmar n waɣir. Dɣa, ayen i asen-d-yeslalen tumert taggara-a, d mi ḥsan aẓayer-nsen, ɣef wakken i d-qqaren, yuɣal am win n widak yellan cwiṭ d iqburen deg lxedma-a. Meḥsub, mačči ɛeddan kan s termit yettunefk-asen ubaɣur n wid i yesɛan ugar n termit-nni, wanag tanmehla n usegmi, tesɛedda-ten amzun qedcen yakan kra n yiseggasen. Tessuli aẓayer-nsen, ur ttuneḥsaben ara d ibujaden. Isalli-nniḍen, yeqqar-d ha-t-an serḥen-d i kra n tedrimt seg tjernant-nsen tamayyurt i yellan tewḥel acḥal d ayyuren, neɣ segmi bdan asɣer deg ctember 2017. « Tura nebda nettḥulfu i teɛkemt tettifsus ɣef yirawen-nneɣ. Ulamma nger deg uqeddic mebla axelles, tikwal nteɣɣed
iberdan, nettruḥu mebɛid akken ad nesɣer, maca ayen i d-yellan taggara-a, yekkes-aɣ cwiṭ kra n leɛtab, yessenqes-aɣ seg
unezgum i nella nettawi d imalasen-aya ». I d-tenna yiwet n tselmadt d tamaynut. Ad d-nesmekti d akken iselmaden merra imaynuten, bdan axdam n usileɣ segmi yebda useggas aɣurbiz, imi ɣas ini tikwal yal ddurt, ad gen asileɣ-nni deg walbaɛḍ n yiɣerbazen n waɣir n Bgayet. Aya iban, itekkes-asen ayendin seg wakud-nsen n usteɛfu, imi ula deg yimuras yezrin, wwten-d ssmana d asileɣ ɣef umaḍal n uselmed. Iban daɣen iḍurr-iten cwiṭ seg tama-nniḍen, imi aṭas seg-sen i yesɣarayen deg yidigan ibeɛden ɣef tnezduɣin-nsen, i yettuḥettamen ad gganen bɛid ɣef wat yixxamen-nsen neɣ ɣef yimawlan. Ladɣa ma nebder-d aɣilif-nni n ubdal neɣ n umbaddel i d-yettilin s tmussniwin d tudmet. Aṭas n yimukan i d-iferrɣen i wid yesselmaden mebɛid ɣef yixxamen-nsen, ‘’maca takadimit n Bgayet tferreq-iten kan s tmussni’’, ɣef wawal n yiselmaden s timmad-nsen i terza taluft.
Kaissa Khalifi