Di tazwara tebda d yiwet n terbaɛt n umezgun i d-ilulen deg Uxxam n yilmeẓyen n taddart n Ain Zaouia gar-asen : Maɛtub ,Yassin Ben Mouhend, Lyes Bachour . Maɛtub : Wagi d yiwen n unaẓur seg terbaɛt , d ilemẓi i yesɛan 20 n yiseggasen di leɛmer-is , s wallal n internet yessaweḍ akken ad yettwassen imi axeddim-is d ayen yelhan .
Aɣmis n yimaziɣen: Amek i tebdiḍ deg uḥric-agi n umezgun ?
Maɛtub: Le monologue ɣur-i, zemreɣ ad iniɣ d taqsidt n tayri , bdiɣ deg ubrid-a si zik. Tamezwarut deg uxxam, ḥemmleɣ ad ten-id-seḍsaɣ. Yemma, d aɣbalu ansi i d-refdeɣ aṭas , ɣur-s d-fɣeɣ. Asmi sɛiɣ 11 n yiseggasen, bdiɣ amezgun deg Uxxam n yilmeẓyen n taddart n Ain Zaouia , dɣa seg umezgun i d-refdeɣ aṭas n temsirin. Ɣef uqerru-nneɣ, yella Mass Amar Sellami, d netta i d aselmad–nneɣ. Deg tazwara, lliɣ ttwaɛraḍeɣ-d kan weḥd-i, syin nuɣal d tarbaɛt, yal yiwen yettak-d tikti-is deg uxeddim-a. Mbaɛd 8 n yiseggasen deg umezgun, uɣaleɣ ɣer wallalen n internet (Youtube ) nxeddem-d tibidyutin. Deg tazwara, ur nesɛi ara aṭas n ttawilat akken ad nexdem tibidyutin iwumi tesfa tugna, meɛna anect-agi ur d-yelli ara d aɛewwiq sdat n wayen ɣer wacu nebɣa ad naweḍ. Nexdem tamawt d akken imferǧen yal ass yettnarni leḥsab-nsen deg la chaine-nneɣ deg Youtube , dɣa d ayen i d aɣ-yeǧǧan nettkemmil .
Mačči kan deg umezgun i telliḍ, meɛna ad ak-naf ula deg ccna, awal ɣef waya…
Ssekcameɣ iman-iw deg yal aḥric, bɣiɣ ad issineɣ ayen-nniḍen. Lemdeɣ cit n tgabart, am wakka nettqessir akked yimdukkal. Mi ara tkecmeḍ deg umezgun, ur tettfiqqiḍ ara deg yiman-ik alamma tzeḍmeḍ akk ɣer wayen i d-icudden ɣur-s .
Amek armi i d ak-semman Meɛtub ?
Isem-a, ur yelli ara d isem-nniḍen neɣ isem n unaẓur, wagi d isem-iw aḥeqqani. Nekk luleɣ-d ass n 25 deg yunyu 1998, ass anda i nɣan Meɛtub, dɣa yemma tsemma-iyi akka.
I yisem-agi n terbaɛd Les chomeurs Kabyles ansi i d-yusa ?
Deg tazwara, tettwalim aql-aɣ d inelmaden, teẓram liḥala n inelmaden amek. Ma yella nniɣ-awen-d Les chomeurs kabyles amzun akken d lemri n liḥala n tuget n yinelmaden neɣ n yilmeẓyen. Nenna-as, ilaq ad nexdem isem ara irefeden ayen nettidir, ad yili yesseḍsay daɣen. Amzun akken d timetti akked yilmeẓyen i d-yessebgan .
Amek i d-tettextirim isental ?
Ttasen-d yisental-agi deg tmetti-nneɣ, ayen i d-yeḍran deg tmetti nxeddem fell-as tibidyutin, acu kan ilaq ad tili tesseḍṣay , daɣen ilaq ad yaweḍ yizen-nneɣ ɣer medden, imi d yiwen gar yiswiyen-nneɣ.
S tidet xas ulac allalen nezmer ad nexdem aṭas , mmeslay-aɣ-d ɣef termit-ik ?
Dɣa ɣef wanect-a, ad d-alsaɣ yiwet n teqsidt. ‘’Yella yiwen n ufellaḥ yettidir deg yiwet n taddart ulac win i t-yessnen, netta yetturar s tjewwaqt. Ttmeslayen fell-as medden, qqaren-as ur yessin ara , ur yelhi ara. Yiwen wass, iḍfer-it ccix n taddart-nni anda akken yetturar, yufa-d belli aẓawan-nni i yetturar ufellaḥ-nni yelha. Yesteqsa-t, yenna-as : Amek armi ? Yerra-as-d : d ayen i ttwaliɣ seg lmal-agi akked tmurt-agi-inu, dɣa xeddmeɣ-d aẓawan-agi. Dɣa seg teqsidt-agi, ad nessiweḍ ad d-nini i yilmeẓyen d akken nezmer ad nexdem aṭas, s tebɣest nezmer ad nessiweḍ anda nebɣa. Ur ilaq ara kan ad neqḍeɛ layas, ur ilaq ara d neḥqer ayen nxeddem.
D anwa anaẓur uɣur i d-tettagmeḍ akka ciṭ?
Yella yiwen ɣur-s i ttwaliɣ iman-iw, wagi d Fellag. Ttwaliɣt d asirem-iw. Tidet kan, ttḥulfuɣ amzun akken sɛiɣ Fellag ar daxel.
Yella kra i d-tettheggim ɣer sdat ?
Ih yella uxeddim. Nettheggi-d aṭas n tbidyutin deg youtube akked yiwen Podcaste akked Djilali Tumert, akken daɣen nettheggi-d yiwet n tezlit ɣef terbaɛt n yilmeẓyen n leqbayel (JSK).
Awal-ik n taggara…
Deg taggara, nessaram tutlayt –nneɣ ad tennerni s uxeddim n warraw-is , ssarameɣ ad awḍeɣ am Fellag imi ḥemmleɣ-t aṭas .
Souhila Yamani