Ass-nni n ssebt iεeddan i yebda leqdic adelsan i d-yettwaheggan i lmend n yimuras iɣurbizen n tegrest, ama deg Uxxam n yidles Mulud At Mεemmer n Tizi Uzzu, ama deg Tneḍfart-is n Azazga.
Ttiεad-agi, ad d-yili gar 22 duǧember alamma d ass 02 deg yennayer 2019. D tagnit ideg ara faṛsen yilmeẓyen imuras-nsen n ccetwa. Ma gar wid i d-isuddsen leqdic-agi adelsan ad d-nebder: Taneɣlaft n yidles, Tanmehla n yidles, Axxam n yidles Mulud At Mεemmer n temdint n Tizi Uzzu, d tneḍfart-is I yellan deg Azazga. Ma d ahil yettwajerden sɣur yimsuddsen-agi d anesbaɣur, imi ttilin-d aṭas n leqdicat deg Uxxam yidles, gar-asen: 4 n yisikwan (unuɣ, taklut, timucuha, tin n tugniwin), timsikniyin n yidlisen, isihar n yimseḍsi d useḥḥar…atg. Turart diɣ n waṭas n tmezgunin, gar-asent; Ccna n leḍyur, Tamussni d tafat… Am wakken daɣen i d-tella iḍelli n ssebt yiwet n tmeɣra meqqren sɣur ugraw n yinelmaden Amaḍal Kids, deg tzeqqa tameqqrant n Uxxam n yidles. Ma deg Tneḍfart n Uxxam n yidles Mulud Mεemmeri n Azazga, ttilin-d waṭas n leqdicat-nniḍen gar-asen: 5 n yisikwan (imuhal n ufus, tira, tusnagurt, unuɣ, uraren n usegmi). Ɣer tama n yirmad-nniḍen yecban; Imseḍsi d useḥḥar, timezgunin, timsikniyin n yidlisen…atg. Bɣan yimsuddsen n leqdic-agi, ad sεeddin yinelmaden imuras-nsen deg tegnatin yelhan, gar usgunfu d temlilit n wayen akk ḥemmlen.
Abdelghani Adaoun