…Ulac win ur nessin Hakim Laâlam s warrat n Pousse avec eux, yal tasebḥit nettmagar-it deg uɣmis ideg yezga azal n 10 n yiseggasen tura, meɛna s wammud n tteswirat, yerna d tiplakin-nni i nettaf ɣef tḥunna, d amaynut ! Amek almi i d-yezger seg tira ɣer tteswirat ? Yenna-k :
«Am tteswirat am tira. I snat d asiweḍ ideg nessawaḍ yes-sen ayen nettḥulfu. Ayen nebɣa ad d-yeffeɣ seg wul-nneɣ akken ad t-slen, ad t-walin, ad t-ɣren yezmer ad yili s ttawil i tebɣiḍ. Yelha ma terniḍ-as-d ayen i k-iḥuzan deg tudert-ik. Nekni ayen i aɣ-iḥuzan d tamurt-nneɣ yuḍnen deg uqerruy.»
Awal yettawi-d wayeḍ almi d-newweḍ ɣer tɣamsa deg Lezzayer. Yedder yeḥḍer Hakim Laâlam i yiɣmisen s teqbaylit meɛna yenna:
«I wacu mačči bezzaf n yiɣmisen s teqbaylit ? S wayen akk nettwali iḍerru deg tmurt-nneɣ nuḥwaj aṭas. Yelha amer llan aṭas i tlellit n tmeslayt. Rray yemxallaf, ɣas yemxallaf yelha. Tira tebna ɣef rray, akken i yemxallaf rray ad temxallaf tira, yewwi-d ad ggten yiɣmisen s teqbaylit. Drus n yiɣmisen s teqbaylit d lmut n umeslay ilelli.»
£ef warrat s teqbaylit am win yettaru yakan deg Le soir d’Algérie, yeḍsa yenna-d :
«Tawaɣit imi ur ttemililen sin n yikabaren n tmurt n Leqbayel ad d-yeslal mačči arrat am win inu s teqbaylit. Yella anda ara d-tagmeḍ,; ttwali kan, tessleḍ,; tettaruḍ.»
‘’Win yettkeyyifen lattay’‘ mazal-it yuki ɣas ma temlilit n ubuddu n udlis-ines tekfa. Γef timliliyin am ti yenna-d umddakel-is Brahim Tazaghart, bab n temzenzut i t-id-iseɛreḍen:
«A win yufan, yal ddurt akka, ad d-nessemlil amaru d wayen yura d yimeɣriyen-is. Azal n tira d wid yesseqdacen asekkil meqqer. Yal yiwen ilaq ad asen-yefk azal uklalen. War tira, ulac ttxamim, ttxamim yemden, win yessawaḍen, win yemmalen i umdan d acu i d tabrat-is di tudert. Ass-a yusa-d Laalam, azekka ad d-yass wayeḍ,; neɣ tayeḍ ; s temliliyin yecban ti, yes ara naf abrid yettawin ɣer tafat, ɣer tneflit, ɣer tudert n tiser d tawant. Ur telli tawant neɣ lehna di tiderɣelt d tinnugfa.»
Dj. Ikhloufi