L’olympia amezwaru Asmi i iɣenna i tikelt tamezwarut deg l’Olympia, yettnadi akken ma yekka yiḍ d acu ara iles. Ass n tmeɣra, ikeccem-d s lebsa n les paras. Seqsaɣ-t, nniɣ-as d acu akka i d lebsa-yi. Yerra-yas-d Matoub : “qrib ad nali ɣer udrar.”
Tasfift tamezwarut
Deg taɣect ay izem, yecna yid-s Yidir anda i as-yeqqar ay yizem anda telliḍ. Imi Yidir i t-id-yezwaren ɣer ustidyu, isekles iruḥ. Jackye Reagan, iregli timacinin ɣer taɣect talqaqt n Yidir. Mi d-tewweḍ nnuba n Matoub, anagar yebda ccna, ireqqasen n tmacinin wwḍen s azeggaɣ. Jackye amɛellem n tzeqqa, yexleɛ yenna-yas : “arrêtez les machines sinon tout va exploser.” Ziɣen d aɣejɣuj a mmi !
Tadwilt 7 sur 7 n Anne Sinclair
Uqbel s yiwen n wass i temlilit n tilibzyu d Anne Sinclair deg tedwilt 7 sur 7, Matoub iqesser iḍ-nni d Yidir, Remḍan d Boudjemaa Agraw. Nnan-as i Matoub heyyi iman-ik i uzekka. Le Rebelle, tameẓẓuɣt-is tella sani, yeqqar kan azekka ad as-seṭleɣ i Levillier (win yellan akked Le Pen).
MCB akked Matoub
Asmi i as-d-bran yirebraben, ɛeddan kra n yiseggasen, Boudjemaa yenna-k nmeslay aṭas ɣef tdukli d beṭṭu i yellan gar yimussuten idelsanen. Sawḍeɣ ad t-qenɛeɣ ad yili ɣef uqerruy n umussu adelsan amaziɣ MCB. Ass n 12 yennayer 1997, neddem rray ad meslayeɣ d yiqerra n MCB i yellan imir-nni ad nwali acu ttxemmimen deg tikti-ya. Taswiɛt, yella-d ayen iɣef ur nebni, ur kemmlen ara lecɣal.
Tameɣra n Matoub deg Tezmalt
Deg useggas n 91, asmi yeḥma useqqi gar FFS d RCD, Yexdem Matoub yiwet n tmeɣra deg tezmalt anda lɣaci d luluf mačči d kra ara tḥesbeḍ. Imdanen zhan, walan-d, azgen ameqqran deg-sen, i tikelt tamezwarut Matoub icennu zdat-sen. Tameɣra tessefreḥ wid tt-id-iheyyan. Ma d tam-nniḍen, yeffeɣ-iten leɛqel, d axessar ! Ad tfakk tmeɣra ad ten-yawi uḥemmal deg Tezmalt. Yiwen seg wid ur nefriḥ,; yerfa mačči d kra. S anda yella yewwet Matoub s udɣaɣ. Nejmaɛen fell-as lɣaci qrib beččeččen-t, lemzeyya iɛessasen llan, ttḥadaren ɣef wanecta, dɣa ṭṭfen-t. Qqaren-d wwin-as-t i Matoub, nnan-as atan d wa i k-id-yewwten s udɣaɣ,; nnan-as ayen i s-tebɣiḍ nebɣa-t, ini-d nekni ad nṭebbeq. Yemmuqel Matoub, akkin d wakka, yemmuqel deg uqcic, yenna-yas :”serrḥet-as, ay yelhan d ssmaḥ ahat azekka ad t-id-nerbeḥ!”
D. I.