“C’est parfait pour anebdu de cette année deg Bougie” akken i d-yenna yiwen n umigri.
D tidet, almi i tt-id-yenna i tt-nwala. Γas anebdu n useggas-a, yegla-d s tfesniwin n lḥuman i iɛeddan nnig 36° deg Bgayet, rnu-yas aɣamac d tidi ; ikumersiyen d tɣiwant mmugren-t-id s wudem-nniḍen. Rnan i yinebgawen n lḥerma, azal-nniḍen i leqder n temdint n Yemma Guraya, d wallal-nniḍen i rraḥa-nsen.
Tamezwarut, tusa-d sɣur yikumersiyen. Aṭas deg-sen i d-yessersen ɣef yiṭrutwaren tibettiyin-nni n waman isemmaḍen. Iḥewwasen, deg ddeq n uzɣal, ad ten-tafeḍ wa deffir wa ɣer tbettiyin-a : wa yettak aman i warraw-is, wa d netta i yettessen, wa yessirid udem-is,… Lḥasun, yemlal uḥewwes d uqesser rrif tbettit. Ma d ilemẓyen faqen ula d nutni, ad ten-tafeḍ zzin i umkan ad ddragin kra ; ahat ad teɣli labɛeḍ n tmigrit s tbettit n waman isemmaḍen !
Tis snat, tekka-d sɣur tɣiwant. Deg yal tama temdint, ad tafeḍ abduz (toilettes publics) neɣ akken i as-qqaren yibjawiyen ccicma. Nnig ccicma, tella tbettit n waman i ččarayen ssrabes n tɣiwant yal ass. Tawwurt n ccicma ad teldi mi ara tegreḍ alef. D ayen i d-irennun kra umesruf i tɣiwant ! D ayen daɣen i yessifsusen kra seg teɛkemt i yiḥewwasen.
Γef waya, nezmer ad d-nini, tanemmirt i yikumersiyen d wid akk ixeddmen deg srabes yemxalafen n tɣiwant i yettxemmimen i rraḥa n yiḥewwasen. D awal ara yawḍen i wayeḍ,; d aḥewwas ara d-yernun ɣer wayeḍ.
Dj. Ikhloufi