Taggara n yimalas yezrin, teldi tɣiwant n Bechloul tibbura-s i ssuq n lmal ilmend n lεid ameqran i d-iteddun. Ddeqs n yifellaḥen d wid yettrebbin lmal i d-yerzan ɣer rreḥba-agi, gar-asen wid ara yessenzen d wid ara yeẓren anda tewweḍ ssuma n wakraren. Tirza nneɣ ɣer umkan-a d tin i yerran lwelha-nneɣ ɣer wanda tewweḍ ssuma n wakraren. D acu kan, ayen i neẓra mačči d ayen yessefraḥen ixeddamen d wid yesεan tajernant rqiqen. S kra n wayen i nwala, yal imrebbi yessutur nnig n 17 000 idinaren. Wamma, akraren yemden kra i twacult meqren, ulac ddaw n 24 000 idinaren. Ttuɣun akk yemdanen ɣef leɣla. Imrebbiyen, si tama nsen, ttnadin amek ara d-afen ssebbat n leɣla, qqaren d akken d leɣla n tisufar n wuççi n lmal i yessawden ɣer liḥala-agi. Akken tebɣu tili tewiεt, d imdanen at tjarnanin fessusen ara yettwaḥermen, ur ttizmiren ara ad zlun ixf n lεid, ad ttwaḥermen daɣ warraw nsen, ur yettnekmal ara lferḥ n lεid.
M. Smail