…Cwiṭ akka atan ileḥq-d Ḥuḥu,mi d-yewweḍ γur-sen,yefreq-asen-d yiwen yiwen n ugirru,bdan imiren ttkeyyifen.Armi kan i d-tεedda xalti-s n Γilas tdukel-d akked urgaz-is, teddun s axxam-nsen.Netta ḥaca i ten-iwala,yessens agirru-nni yellan deg ufus-is irceq-it deg uxjiḍ,yekker ibedd ad ten-imager amzun akken dγa d nutni i yettraju γef tseddart n lğameε yetwelhen γer webrid.Mi d-leḥqen ar γur-s,iεedda yemsalam yid-sen,taswiεt kan tewwet xalti-s γer lsak-is,tejbed-d tawriqt n εecrin alef tmudd-as-tt γer ufus-is tenna-yas :
Ta d lweεda n Sidi Saleḥ,γur-k ur as-tt-tettawiḍ
ara !
-Yeṭṭef-itt,yenna-yas :Yarbeḥ a xalti.
Widak kemmlen abrid-nsen s axxam, ma d Γilas yuγal-d γer yemdukal-is.Samir yellan yettraqab-d acu yellan γef liqrib,yenna-yas :
Limer ad nruḥ-t γef yiman-nneγ γer lbilaj,ad nurar baby-foot yerna ad naγγ dexxan,mačči akka ay axir ?Wi ara iεelmen belli nserref isurdiyen-agi n lweεda !?
Mi d-yenna akka Γilas yessusem kan,yebγa ad yeqbel lameεna daγen yugad ;ma d Ḥuḥu iεeyyeḍ γef Samir,yesbeggen-d lγec-ines γur-s imi yebγa ad yečč lweεda.Netta yellan d aqcic i trebba yemma-s s ttnefcic,tesselmed-as akk tiflesin-ines,armi i yuγal yettagad ula d imqerqar yettγil-iten d iruḥaniyen.Mi yeẓra akken Γilas mazal-it ur d-yefki ara εad rray-is,yekker inubeh-it :
-Ḥader a Γilas ad tqebleḍ ayen akka i d-yeqqar umcum-agi,acku ma txedmeḍ-tt ad k-yemsex Sidi Saleḥ ad k-yerr d kra…
Weqbel ad d-yekfu awal,Samir igzem-as-t :
-Ad t-yerr d iẓẓan !Atan ad tessusmeḍ neγ tura kan ad ak-sedgedgeγ iγsan-ik.
Mi s-yesla akka,yugad-it iεedda yessusem.
Γilas,ula d netta yesεa tugdi ladγa tin n sselaḥ akked yiεessasen,wid iγef yezga isel γer yemma-s akked setti-s timucuha-nsen yeččuren d lberhanat d wayen ur iqebbel leεqel.Netta yakan s timmad-is dakken ilul-d γer ddunit armi i tedεa yemma-s di ttabut n Sidi Saleḥ,netta imiren yeqbel-as-d tawatra-ines,wama tuγ-itt truḥ fell-as dderya acḥal !
Akka i yas-d-teḥka assen deg tt-yesteqsa γef tlalit-is.Ass-nni, wwten fell-as lbarud,d xali-s Ṭeyyeb i yewwin izimer ugḥil ideg teqqen γer temεemmert.
Seg tama-nniḍen,yeldi-yas-d tiṭ Samir.Netta yellan yeccumi,imenna-d ulamma ad yurar ula yiwen n wass am netta am arrac-nniḍen.D ayen i t-yeğğan ad yeεfes γef tugdi i t-yentaben,yenna-yas deg ul-is :
ṭunpi !axi yakan ad nezhu ula yiwen n wass,ma d lweεda-yagi ad tt-nefk tikelt-nniḍen.
Ḥuḥu mi yeẓra Γilas akked Samir bdan ttemtafaqen amek ara ččen isurdiyen n lweεda,iruḥ yeğğa-ten,ma d nutni ṭṭfen abrid di sin yid-sen γer lemqam.
Dinna,Γilas s nniya i yemmeslay γer ttabut n Sidi Saleḥ :
“ A Sidi Saleḥ,kečč yeẓran kulci ;nekni d arrac nuḥwağ idrimen,kečč ttwaliγ tesεiḍ asenduq yeččur.Σfu-yaγ di leεnaya-k ad nserref εecrin alef-a ;atan ad ak-qneγ belli ad ten-id-rreγ asmi ara sεuγ”.
Mi yella akken yettmeslay,tuγ-it yeccuεben weksum-is si tugdi,ula d Samir yellan yid-s yugad cwiṭ.
Mi d-ffγen si lemqam,ruḥen qsada γer lbilaj.Sεeddan din ass-nsen akken ilaq :uraren baby-foot,ččan leḥlawat,rnan uγen-d dexxan d cemma.Tameddit mi d-uγalen,teddun deg ubrid cennun,mi d-kecmen γer taddart,yuγ lḥal yeγli-d yiḍ,yal yiwen yerra s axxam-nsen.
Σeddan wussan segmi teḍra taluft,Samir d Ḥuḥu ttun-tt maḍi.Γilas ula d netta yettak-d udem amzun akken dγa s tidet yettu,maca aqerru-s yezga ixeddem leḥsab.
Netta, yal mi ara d-yeγli yiḍ ad zzint fell-as,ur yuhwan weqcic !D tiktiwin tiberkanin i yas-d-yettasen,d tiktiwin-nni i yelmed γer yemma-s,tid i yas-d-tfesser setti-s,tid werğin yesteqsa fell-asent wiyaḍ,tid iγef ur ttmeslayen ula deg uγerbaz.Akken kan armi i saγent deg-s mebla ma imeyyez tilisa yellan ger tmeẓẓult i ifehhem s tḥerci-s akked tmucuha i yeẓẓan deg uqerruy-is,ruḥ tura kečč kkes-itent !
Yal iḍ ad yemmekti,taqsiḍt n Muḥ Amengur i ixellsen deεwessu n baba-s yeččan timεemmert,neγ tin n Σli Abuhali i d-yeğğan tmanya n yiεeggunen imi yemma-s tella tettaker rrda n Sidi Saleḥ,teznuzay-itt di ssuq n lxalat.
Timucuha-ya akk d setti-s i yas-tent-id-yeḥkan,yerna γur-sent tid i yas-d-tewwi yemma-s γef lberhanat akked lqedra i yesεa Sidi Saleḥ.Nettat tezga teqqar-as :
“ Sidi Saleḥ a mmi ur yemmut ara ;kul leεca yettuγal-d d amγar anect ilat :acamar-is d acebḥan,iεennu imcumen s usu,ad aγ yenğu Rebbi seg-sen”.
Yuγal yettxayal amγar-agi,yegga-yas tugna deg allaγ-is.
D lewhayem,amek ula d at Wexxam, ur rrin ara ddehn-nsen γer mmit-sen,imi di kra kan n wussan tbeddel ssifa-s.Teγli-d fell-as ṭεafa yuγal am uceṭṭiḍ ;udem-is werra&gamma,; tiqit n yidammen ur tekki-t.Ula d lmakla,yuγal ur itett ara.
Ass s wayeḍ, lhem yettnerna deg uqcic ur nuhwan.Mazal-it εad ur yeldi ara tiwwura n tudert armi i t-yentab waṭṭan.Limer meqqar yella win umi ara yeḥku ahat ad as-yessifes.Anwa umi ara yeḥku ?!Amdakel-is Samir,yettwali-t d lkafer ur yettamen ara s tigi am netta am baba-s.Ula d at Taddart s yir tamuγli i ten-ttwalin,imi ur llin ara d inesliyen.Wi yeẓran ansi i d-usan ?Kra qqaren-d seg at Qasi,llan wiyaḍ i d-yeqqaren belli lasel-nsen d Uwdayen,kra ttwalin-ten d aklan,…
Lḥasun aẓar-nsen ur icud ara γer Sidi Saleḥ,daymi i ten-rran d imṭurfa γas ulamma zeddin di tejmaεt.
Γas akk aya,tadukli yezdin Γilas d Samir tugar tin n watmaten ;ula d timucuha-ya n unadi γef yiẓuran n lejdud ur tent-ssinen ara,neγ ma slan-asent γer wiyiḍ,ur cliεen ara seg-sent.
Ula d at Wexxam ur yezmir ara ad asen-yeḥku γef tedyant yeḍran yid-s,acku yugad imawlan-is ad t-wwten,ur t-reḥḥmen ara imi netta yexdem ddnub d ameqran.Qalma akken teqqar setti-s : “ Win yeččan lweεda n lewli,mazal-as din !”.
-Arjujen d yiḥebbiren ur t-ğğan ara ad igen uḍan,armi kan i yas-d-tusa yiwet n tikti :ad as-d-yaker εecrin alef i setti-s.D wa kan i d abrid i s yezmer ad yesseγti lγelṭa yexdem.
Iεus tamγart armi d ayen truḥ di tnafa n yiḍes,yekcem-as imiren γer texxamt anda teggan cwi cwi.Yewwet γer ddaw n usummet-is,yeddem-d s leεqel ttezḍam-is,mi t-yeldi yekkes-d seg-s yiwet n tewriqt n εecrin alef,yerra-t s leεqel γer umkan-is,yeffeγ-d syin amzun kra ur yeḍri.
Akken yakan deg yiḍ i yeṭṭef abrid γer lemqam i d-yezgan berra i taddart.Kra iteddu, yettnernay lxuf deg yidisan-is,abrid yexla,ṭṭlam yuγ-d akk tamurt,ḥaca ssut n bururu akked rrkeḍ n yiḍarren-is i iεemmren tamurt lawan-nni.Γas akken,tugdi,yelḥa armi d lemqam ;mi yewweḍ isaγ tacemmaεt.Imir kan teḍher-as-d ssifa n umγar s ucamar d amellal yeqqim tama n ttabut,yeqqar-as-d s taγect d tazurant : “ BUBU-NI NEΓ AD BECCEΓ KANUN-I !”
Aqicic mi s-yesla,din din yekkaw si lxelεa.Yenneqḍaε deg-s nnefs,imi-s yettserriḥ-d i ikeffa,yeγli γer lqaεa yesreε.
Di lawan-nni,at Wexxam n uqcic,yal wa amek i yunag di tirga-s.Ula d yiwen ma yeẓra acu isaren yid-s.Tasebḥit mi yuli wass,arrac akk n taddart ffγen-d s azniq ad uraren,ala netta i ixussen.Ula d yiwen ma ifaq belli ulac-it gar-asen,netta iruḥen di tnafa zdat n ttabut n jeddi-s Saleḥ ad aγ-d-yenfeε Rebbi s lbaraka-s !am wakken i teqqar setti-s akked yemma-s mi ara t-id-bedrent deg umeslay.Alukan ad t-id-yebder yiwen d aḥerfi zdat-sent !Anaγ ad γlint fell-as s ddεawi n ccer : Ad ak-yexdem Rebbi akka d wakka,Ad ak-d-yefk Rebbi aya d waya,….
yettkemmil…
Mokrane Chikhi