Nhewwalen akk yiduba n umaḍal ussan-agi ineggura mbeεd mi d-yennulfa lsit n lantirnat umi qqaren Wikileaks. Amḍiq-a i d-yeslul Julian Assange,yessufuγ-d isallen uffiren i ttembadalen yirgazen n ddiblumasiya n tmura n ddunit.I yefkan lwelha d tibratin n yidublumasiyen n tmurt n Marikan ideg llan yisallen yerzan ladγa:tiyita n Iran,lumur n tmura n waεraben, llan ula d wid yerzan tamurt-nneγ.
Imdanen akka tura ṭṭafaren s lqewwa isallen yerzan Wikileaks akked win t-id-yeslulen,ladγa imi Julian Assange akka tura atan yettwaṭṭef segmi i isellem iman-is i yiγallen n laman n tmurt n Legniz.Aṭas daγen n leswat n yineγmasen d wid i iqeddcen deg yizerfan n umdan luεan-d i usaned n lsit-a imi bab-is yeldi-d tawwurt d tameqrant i tlelli n umeslay.Llan daγen wid i yettwalin aya d tikerkas imi lsit d ddiεaya kan n yiγallen n CIA i ixeddmen i lmaslaḥa n Israel,tamurt iγef ur d-ddin ara akk yisallen i tt-yeεnan deg-s !Ma da γur-neγ aṭas seg les brobros-nneγ i d-yuγal usirem segmi i d-neqlen kra n yiγmisen yiwen n yisalli seg Wikileaks,ideg yura deg yiwet n tebrat n ddiblumasiya n Marikan belli win ara ixelfen aselway Bouteflika d mass Hmed Ouyahia!Ahat d tidet imiren ad tuγal tmaziγt d tutlayt tunsibt di Lezzayer.
Mokrane Chikhi