Yal tameɣra ara d-yilin ttheggin-as yimdanen ttawilat I tt-iwulmen. Uqbel lɛid ameqran, leswaq akk zehhren seg tmacinin n useqḍeɛ n yijenwiyen. Ma d lɛid ameẓyan, yal azniq yeqqel d ssuq n yiselsa. Lḥasun, yal asiher yesɛa ayen ara t-id-ibeggnen uqbel ad d-yaweḍ.
Tin akk yerḥan imdanen, d tisin n Lmulud, neɣ ahat asmekti n tlalit n Nnbi Muḥemmed. Kra n wussan uqbel ad d-yaweḍ, tikwal aggur s lekmal-is, ddunit akk ad tettṭerḍiq. Ur yezmir yiwen ad yeqqim yertaḥ deg yiwen n umkan, melba ma yedduqes, neɣ ad iteddu deg ubrid alamma ssefrawsen-t warrac imeẓyanen. S tidet, ɣur-sen d zzhu, d urar d lferḥ. Maca, anda-t ccɣel n umeqran, n ubabat deg liḥalat yecban tigi ? Mačči drus n lwexdat i d-yeḍran s lḥerraqat-agi. Acḥal n umeẓyan i yewwin ccwami deg wudmawen nsen, acḥal n wid iwumi qrib ddreɣlent wallen-is. Maca, nettwali di lbaṭel, nettɛemmid. Deg sin n yiseggasen yezrin, iɣallen n laman rran afus ɣef yiwen n umetjar n ttawilat-agi, kksen-as tazdemt s wazal-is, rnu, ssawḍen-t ɣer uxxam n ccreɛ. Acḥal n yisuḍaf I d-yefɣen beddemma n waya, maca, amzun I yiɛeẓẓugen iwumi ttmeslayen. Mazal ar tura tjaren deg-sent yimdanen. Nutni, awidukan ad d-awin tadrimt, ayen yebɣun yeḍru. Yezmer lḥal, ula d arraw nsen ur ttmuqulen ara ma ssexdamen-tent neɣ ala.
Aseggas-a, ɣas akka bdant skarayent lhul di temdint, ur neẓri ara anda I tent-ufan warrac-agi, imi asenz nsent deg leswaq yenqes.
Sylia. M