Taggara n yimalas yezrin, tedder yiwet n twacult deg tɣiwant n Lesnam deg yiwen n leḥzen d ameqran mi akken yemmut yiwen seg yiɛeggalen-is di lɛemr-is 31 n yiseggasen. Tawaɣit-a teḍra-d mi akken yella yilemẓi-a ixeddam deg temdint n Tubiret ur yedmi d akken ad d-tejbu yiwet n tkerrust ara yifriren i ẓẓerb yellan yakan yettwaxdem. Bab n tkerrust yellan iteddu s leɣseb yegguma ad yerr aḥkim neɣ ahat ad yemlek ṭumubil-is yeǧǧa-tt tetteddu nnig ubrid, ddaw ubrid almi tejba s anda yella umeɣbun-a, tenneqlab fell-as, dɣa yessufeɣ ṛṛuḥ deg umḍiq. Ma d anehhar, yettwajreḥ kan. Yemḍel yilemẓi-a deg taddart-is, anda ḥeḍren aṭas n yimdanen. Ma d imsulta ata-n ldin yiwen n ukaram n unadi iwakken ad d-beggnen tamentilt n twaɣit-a.
S. M