Aḥric n usiweḍ di lwilaya n Tizi Wezzu d win i iceɣben lɛamma. Ussan-a ineggura, ḥebsen axeddim imawlan n yigurguten d ttawilat nniḍen n usiweḍ. Sebba n waya d abeddel n wemekan n weḥbas n ttawilat usiweḍ ɣer berra n temdint n Tizi Wezzu, s-ɣur imeḍbren n tnemehalt n usiweḍ. D ayen yeǧǧan ula d iminigen ad rfun. Ad nesmekti belli niqal aya ad d-yili di 16 yunyu i iɛeddan, yuɣal yettwaxer ɣer wass n umenzu n yulyu s sebba n weḥbas n imawlan n wallalen n usiweḍ. Llan-d, dɣa, aṭas n yinejmuɛn gar tidukla n imawelan usiweḍ d yemḍbren n weḥric n usiweḍ. Yufrar-d seg inejmuɛen belli ttawilat n usiweḍ n tiɣiwanin n Buǧimaɛ, At Issa Mimun d Wagnun ad ḥbessen deg Pont de Bougie , wid n At Dwala, At Wasif, Iwaḍiyen d At Yani ad ḥbessen deg umekkan n uneḥbus n At Dwala. Ddayrat n Makuda, Tigzirt ad ḥbessen deg Buxalfa, ma d tiɣiwanin n wunẓul n lwilaya ad ḥbessent deg Wad Issi. S wakka ɣas akken yettban-d belli aɣbel d win yefran maca, mazal imezdaɣ d wid yugaden amesruf ara sen-d-tesqam teswiɛt-a. Amedya, win ara irekben seg tɣiwant n Iflissen n lebḥar ɣer temdint n Tizi Wezzu ad ixelles 210 n idinaren gar rewaḥ d tuɣalin, imi ad ixeles 50 DA ɣer Tigzirt, 140 Da ɣer Tizi Wezzu, d 20 Da deg umekan uneḥbus neɣ la station intermédiaire., ma yerna iruḥ ɣer la nouvelle ville s 30. S wakka, ad taweḍ ¨ɣer 240 Da! Aya melba ma neḥseb aḍeyeɛ n lweqt! S wakka yal iminig ad yernu nnig n 20 Da n lemesruf. Rnu ɣur-s, imekwan-agi uneḥbus, am win n Pont de Bougie, d wid ibaɛden ɣef temdint deg teswiɛt anida ulac laman, ladɣa I tilawin d tlmeẓyin i ixedmen alama d lxemsa n tmeddit, ladɣa deg cetewa.
Dalila.I