Akka i tḍerru i wid i d-yettheggin usu uqbel naddam. Inelmaden n uɣerbaz alemmas Bouriah Lounis deg Yibehlal ssazewɣen udmawen n yiselmaden nsen deg ukayaḍ n taggara n uswir alemmas. Ufraren s kra n yigemmaḍ yessettuyen leɛtab n useggas, imi ḥala sin n yinelmaden kan ara iɛawden deg useggas aɣurbiz i d-iteddun. D aḍu n rrbeḥ i d-isuḍen ɣef uɣerbaz-agi. Maca, mačči s lewhi kan i d-iɛedda. Aya, yekka-d s lxedma, leɛtab d umyizwer gar lecɣal. Deg lakul-agi, ama d iselmaden neɣ d imḍebbren nniḍen, ur rǧin ara amakrad wis tlata iwakken ad sseḥluliyen deg temsirin. Dɣa deg waggur n tuber yezrin, mi d-nemmuger O. Dellys, s timmad-is d anemhal n uɣerbaz-agi, yenna-d d akken bdan ttarran-d inelmaden n uswir wis-4 yal ass n ttlata tameddit, aya teɣzi n useggas i merra. Iselmaden akkan ma llan beggnen-d lebɣi nsen s axeddim d tikci n ufus n tallelt i yinelmaden nsen. Ineggura-agi, imi d wid iceffun i lxir, cebbḥen-d aɣerbaz nsen, gemren-d s ujemmal !
Ad d-nesmekti kan belli aɣerbaz-agi ur telli d tikkelt tamezwarut ara d-ilin igemmaḍ yessefraḥen. Yal taggara n useggas yezga yeṭṭef imukan imezwura. Mačči d zzher i yesɛa, d irgazen d tlawin yellan deg-s i ikesben nniyya !
Ad d-nerr lwelha kan belli inelmaden-agi yefkan azal ameqran i tutlayt nsen tayemmat ssawḍen almi i d-wwin tizmilin yessefraḥen. Ɣef leḥsan n yimeslayen i d-yenna Y. Azeradj, yiwen seg yiselmaden n tmaziɣt deg uɣerbaz-agi, ḥala sin n yinelmaden ur nessaweḍ ara ad d-ḥellin igemmaḍ yelhan, wiyaḍ akk ufraren-d akken i nella nessaram.
Sylia. M