Massa Bouchafa, gar tlawin yecnan s teqbaylit s tebɣest. Asmi tebda ccna, mazal akukru n tmeṭṭut seg ccna d tẓuri akked tugdi i ireṣṣan di tmetti n lawan-nni, s lweḥc i d-yexleq rrebrab. Teḍfer Massa Bouchafa abrid-agi n ccna imi i t-tḥemmel, tefren ad tili d tagensast n tulawin akked tumast yettwakeblen. Yenna fell-as T.Djaout, aseggas n 1989 “D tacennayt i iceɛɛlen isuyas n tzeɣwa n ccna”. Isem-is aḥeqqani Zaina Nait Chabane, tlul deg useggas n 1964, deg tɣiwant n Yililten, Micli, deg Tizi Uzzu. Segmi tella d tamecṭuḥt, yezdeɣ-itt ccna, “Asmi sɛiɣ 4 neɣ 5 n yiseggasen, gganeɣ ttenkareɣ s rradyu tis snat, allal awḥid n teqbaylit imir-n, selleɣ i umezgun. Cfiɣ, yal taṣebḥit, tessakay-iyi-d yemma akken ad sleɣ i tezlit n Cherif Kheddam “Ṣbeḥ lxir ay udem n rrbeḥ”.
Tekker-d s tezlatin n Sliman Azem, Zerrouki Allaoua, Hnifa, Bahia Farah, Matoub d Aït Menguellet. Tebda s wurar n lxalat d ccnawi n tuddar s ubendayer. Syin tkemmel deg uɣerbaz, s tallelt n uselmad-is Rezig Kaci. yiwet n tikkelt tecna-d deg uɣerbaz n L.N.Yiraten, tizlit n Nora “Adrar n Ǧerǧer ɛlayen”, yeḥḍer Ṭaleb Rabeḥ, yessebɣes-itt, asmi i as-yenna tzemreḍ ad tuɣaleḍ d tacennayt tameqqrant. Dɣa syin i d-tebda, tcennu di tesdawit. Uqbel ad tinig ɣer Fransa, tecna deg tzeqqa n Mutualité akked Allaoua Bahlouli d Cherifa, s lmendad n rradyu Beur i d-iheggan tameɣra, seld amtawa gar umsuffeɣ Dadouche akked urgaz-is. Syin tessuffeɣ tizlit s ccna-ines di tmura-nniḍen, am Canada, USA, Belgique, Hollande, Maroc, Australie …
Aṭas n tezlatin i as-yura urgaz-is M’hend Bouchafa. Tecna tuɣac n tmeɣriwin d lfuruḥ, d tid n ccḍeḥ, am Inebgawen, Ma tufiḍ, Yeǧǧa-yi. Maca ur tezgil ara tizlit tamḥaddit, anida terra tajmilt i Mulud Mɛemri, tecna daɣen Tiɣri i Yimaziɣen d tiyaḍ. Ass-a, tessaweḍ Massa Bouchafa 30 n yiseggasen n ccna. Ɣef waya, thegga-d yiwet n tmeɣra meqqren di tmurt n Fransa, deg tzeqqa n Cabaret sauvage, ass n, 8 meɣres 2020, i usfugel n kraḍ n tmerwin n ubrid iḍulen i tuɣ deg tẓuri. Tefren 8 meɣres, ass agraɣlan n tmeṭṭut, akken ad as-terr tajmilt i tneggarut-a. Maca ɣur-s daɣen iṣenfaren, am tuzzya n ccna i tebɣa ad texdem deg waṭas n tamiwin n tmurt n Lezzayer. Aheggi n uḍebsi, anida ara d-tejmeɛ ddeqs n tezlatin i tecna ɣef teɣzi n umecwar-is, seg tid yufraren, ad tent-tesdakkel deg uḍebsi-a, s wallalen atraren.
Kh. A.