Γas ma yella ulac win ur negzi belli Covid-19 d amahi ɣef umaḍal s umata, ladɣa seld amḍan ageεmir n wid yemmuten di tmura n ddunit yis-s, lameεna di tmurt, mazal ar ass-a ur ttwaqenεen ara kra n yimdanen s tewεeṛ n waṭṭan-a. Ula d timura yeqwan di ddunit dɣa, εewqent, mazal ar ass-a ur as-d-ufint ara ddwa. Aredmani, armi d ussan-a ineggura, imi llan wid yemmuten di tmurt, i ḥṣan medden belli, ulac d acu ara ten-isellken, anagar aḥader ɣef yiman-nsen. Neɣ s unamek-nniḍen, ur llan sbiṭaṛat, neɣ d ttawilat ara ten-imenεen di tmurt-nsen. Ihi d takayt-nsen, ay d ddwa n waṭṭan-a. Daymi i yuzzlen kra n wid ifaqen deg tdayṛa n Yiɣil Ɛli i usendeh n yimezdaɣ n tuddar-nsen, yal yiwen s wacu iwumu yezmer. Ula d aselway n tɣiwant n Yiɣil Ɛli, ittekka deg usendeh-a.
Aneggaru-a, deg wawal-is i d-yewwi deg tmeɣṛa i xeddmen ussan n 14 d 15 meɣṛes yezrin, i lmend n umenzu n tefsut, yessefhem-d imezdaɣ ɣef umahi n lehlak-a. Yerna yessuter-asen ad qqimen deg yixxamen-nsen, imi d win i d tifrat iwulmen i wakken ur ifetti ara. Ad d-nesmekti d akken seg yimir-n refden yimezdaɣ n temnaḍt-a tamsirt, d ayen i ten-yeǧǧan wexxren ɣef yidigan anda i ttnejmaεen medden, am leqhawi, imraḥen…atg. Seg tama-nniḍen, llan wid i d-yeffɣen ɣer yiberdan s tqerεatin n ṣṣabun n usired n yifassen, ttmuddun-tent i yimsebriden. Amedya n wigi, d Mass B.Xiyaṛi. Am wakken i llan wiyaḍ i yesuzzren tikmamin i yimezdaɣ. Ma d ass n 19 meɣṛes, seld asuter n lwali n Bgayet i yimḍebbṛen n leqhawi, d tneččiyin bac ad bellεen tiḥuna-nsen. Rran-d ineggura-a i tiɣṛi s buhan, imi amur ameqqṛan deg-sen, bellεen-tent. Ula d ixeddamen n tɣiwant n Yiɣil Ɛli, ḥebsen axeddim-nsen, acku bɣan ad ssizedgen axxam n tɣiwant uqbel. Di taggara, nessaram ad defṛent tɣiwanin-nniḍen abrid n tin n Yiɣil Ɛli, ahat ad yemmet uvirus-a.
K. K.