Ass n 11 di tuber 2014 ay fkan, s wudem unṣib, isem n Slimane Azem i yiwen umekkan di temdint n Paris, deg tγiwant n (14ème arrondissement). Leqdic-a i d-heggant kra n tdukliwin s lemεawna n tγiwant-a, yella-d tajmilt i umecwar n ccna n Slimane Azem.
Deg wahil, ad naf : tisfifin tiqdimin d yiḍebsiyen-nni n zik n ccna-s, kra di leḥwayeğ ines. Teṣwirat n twacult-is ur ẓrin medden yakan, isefra sγur arrac imecṭaḥ.Am wakken ad yili, di&gamma,; uwali n yiwen ufetray (documentaire) s yisem ‘’Slimane Azem, une légende de l’exil’’ syin, ad d-yili umeslay γef usaru-agi.
I usmektu, Slimane Azem ilul ass n 19/09/1918 deg Ugni Geγran, di tmurt n Leqbayel. Yedder di twacult n 5 warrac d 2 n teḥdayin. Yunag deg useggas 1937 γer gma-s Ouali. Deg useggas 1945, yekra lqahwa u yesbedd-d yiwet n terbaεt n ccna. Yessekles i tikelt tamezwarut tasfift i wumi isemma ‘’ Ma ad tedduḍ ad nruḥ’’ deg useggas n 1958. Syin i yebda umecwar n ccna-s yettnerni u yettmuccuε armi yewwi aḍebsi n ddheb, netta d tcennayt Noura, deg useggas n 1970.
Yemmut Slimane Azem ass 28/01/1983 di tmurt n lγerba, di Moissac anda yesεa tibḥirt n tneqqlin d tzemrin i as-yellan d rriḥa n tmurt. Seg wakken sugten fell-as awal, yenna-d :’’xir ad idireγ d Azzayri di berra wala d aberrani di tmurt-iw.’’
Hocine.M
Tamaziγt di Maruk Anda i tufeg i ters !
Xas ulamma tamaziγt d tutlayt taγelnawt u d tunṣibt di tmurt n Maruk, meεna ur yelli d acu ibeddlen di liḥala n tutlayt-a d yidles-is. ‘’Yiwen uḍar γer sdat, sin γer deffir’’ akken qqaren. Akka, dγa, deg ussan-agi iεeddan mi akka i uγalen yinelmaden γer uγerbaz i d-yenṭeq uneγlaf n leqraya n tmurt-agi n Maruk u yenna-d :’’ d akken mačči imi tamaziγt d tutlayt tunṣibt (2011) lmeεna-s ad tettuselmed’’. U ikemmel yenna : ‘’d tutlayt taεrabt s wayes ara d-yelhu uγerbaz n uzekka’’. D aya kan !!!Akka i yegzem usiren n wid-ak yenwan d akken Tamaziγt ad taf iman-is di Maruk ma ulac meqqar deg uγerbaz. Uqbel, yakan, yettban usigna s wayes tekkat. Di tazwara, tettuḥezzem tira n tmaziγt s yisekkilen n Tifina&gamma,; syin mi d-xelqen aseqqamu IRCAM, yella-d uṭixer n 7 n yiεeggalen-is deg yiwen ubrid. Aya, yeḍra-d imi as-d-xelqent kra n tamiwin n leḥkum uguren i useddu n wahil n tesqamut-a xas ulamma llan yiwellihen n ugellid i yettweṣṣin γef usnerni n tamziγt deg useggas-nni n 2011. Meεna, di lweqt-nni d tamsalt n tsertit ! Σlaḥasb n yirgazen n lqanun, qqaren-d Tamaziγt ilaq ad tesεu leqwanen-nniḍen zyada γef tmendawt i wakken ad tt-tettuḥettem deg uγerbaz. D anect-a, dγa, i yeğğan aneγlaf n leqraya n Maruk i wakken ad yini lehdur-nni. Wissen kan ma tella tririt i wanect-a i sγur yimeγnasen n Tmaziγt neγ dayen bran i ṭṭbel deg waman. Akken i aγ-d-yenna yiwen :’’wissen ma mazal uklalen Yimaziγen isem-agi ‘’Imdanen ilelliyen ‘’?
Hocine.M