Yella lwali n Wehran Mass Ɛebdelqader Ǧellawi d unemhal n umaris aɣelnaw n timerrit d kra n yimasayen n twilayt deffir n beddu n umahil n lkar n (ONAT) “Wehran City Tour”, d lkar imerri amezwaru deg twilayt n Wehran. Yusa-d wayagi ɣef yiswi n unerfud n taɣult n timerrit di twilayt-a yettheggin ad d-tessuddes uraren n yilel agrakal deg unebdu n 2021. D amaris aɣelnaw n tmerrit (ONAT) i d-yefkan tikti s uwellih n uneɣlaf n tmerrit d temguriyin timensayin. Ɣef waya, iwekked-d lwali n Wehran belli afurgu-a i yebdan ass n arim, 10 duǧember 2019, ad d-ittezzi i waṭas n yimeḍqan n Wehran, ineggura-a, ttufernen-d sɣur imazzagen n unnar n umezruy d tgemmi n Lezzayer.
Ma d anemhal n timerrit n Wehran , yenna-d « Tusa-d tikti seld mi d-terra Tenmehla-nneɣ asira aqdim n tmerrit, i yuɣalen d ayla n umaris, d ayen ara t-yeǧǧen ad t-yesseqdec i uwelleh n yiḥewwasen akked yimniren (les guides) ara yilin i lmend-nsen ». Ɣef wakken i d-tewwi teɣbalut-nneɣ, abrid ara tettawi lkar-a, ad yettɛedday ɣef 11 n yidgan inmazrayen deg temnaḍt n Wehran, ad ibeddu seg uzniq n Mohammed Khemisti, ɣer wammas n tkadidralt d leqṣer n yidles, syin ad ikemmel ɣer yiɣrem Sidi Lhewwari d tebḥirt «l’étang» d lḥemmamat n Tturk, ad yaweḍ alamma d annar n waddal n yizgaren, syin ad yali ɣer temnaḍt “Igli yebhan” (belle horizon) deg udrar n Mulay Ɛebdelqader, syin ad ikemmel ɣer lqelɛa n Santa Kruz d tmesgida tamasiḥit, u ad d-yuɣal alamma d talemmast n temdint s tikkin-ines ɣef front de mer.
Akud n tuzzya-agi ad yaweḍ ɣer kraḍ n yisragen, ma d abeyyi n lexlaṣ ad yili d azamulan s 250 idinaren s uneḥsub n ubeyyi n unekcum ɣer lqelɛa n Santa Kruz s 80 idinaren, u ad ilin itikiyen uzzigen i yisdawanen d twaculin. I usmekti, afurgu-a d ameqqran d amaynut, ad yeǧǧ iḥewwasen ad rtiḥen daxel, ad ixeddem snat n tuzzyiwin i wass, tamezwarut ɣef 09h00, tis snat ɣef 14h30 n tmeddit. Iswi-ines d tukci n tegnit ama i yimdanen i izedɣen di Wehran, ama i wid i d-yettasen seg twilayin tiǧiratin, akken ad issinen imeḍqan inmazrayen n temnaḍt-a i d-yessebganen udem adelsan anmazray n Yihran. Rnu ɣer waya, ma tewweḍ s iswi-s tikti-a, ad d-rnun sin n yifurguten-nniḍen deg yizmaz i d-iteddun, ara irezzun ɣer yimeḍqan deg tamiwin ur nelli ara deg wahil n umezwaru-a, i d-yenna lwali n twilayt n Wehran.
Khaled Achoui