Accueil Tamazight Anyir

Cwiṭ seg tmucuha n leqbayel

Anyir

135

Yella yiwen urgaz, yal ass ihedder i warraw-is: “A tarwa, ur yelli kra i d-yettasen kan akka, ilaq ad tilim d irgazen”.Dɣa, ad d-tenṭeq yemma-tsen: ‘’A-ten-in d irgazen”.Argaz: “Win yellan d argaz, ur yeggan ara alamma d lweqt n yimekli, maca d netta i d-yettṣewwiren ayen akken ara yečč. Nekni zik, neṛwa leεtab, nectaq aγrum”.

Tameṭṭut: “Ihi tura! nutni yefka-d unyir-nsen”. Argaz: “A tameṭṭut, anyir ur d-yettak ara alamma tefkiḍ-as, aql-i ṛwiγ leεtab, mačči d yiwen wass ad asen-nili d i lmendad”. Tameṭṭut: “Awlidi d anyir-nsen i d-yefkan, di leεnaya-k anef-asen i warrac”. Yal ass akken, armi d tikkelt, yezɛef urgaz nezzeh, yeggul ar d asen-yefk tamsirt i seg ara fehmen. Yeddem lekwaγeḍ-is, yenna-asen: “Lḥaṣul, aql-i ad ruḥeγ γer yinig”. Iruḥ. Akken εeddan kra wussan, yebda laẓ d lḥif γef uxxam la d-iγelli.

Ayen akken akk wulfen, ulac-it, imir-n fehmen belli d baba-tsen i yettγummun ixejḍan n wuguren n ddunit. Argaz, yeqqim, yebγa ad jeṛṛben acḥal teswa lxedma. Asmi i d-yuγal, qublen-t yakk s imeṭṭawen, yal yiwen acu i as-yettcetki. Tenṭeq tmeṭṭut-is: “Annaγ ay argaz, teğğiḍ arraw-ik i cceṛ ur d-tennulfaḍ fell-aγ”. Argaz: “Nnaγ asmi ruḥeγ d anyir-iw kan i wwiγ, wamma anyir-nsen γur-sen i yeqqim. Acimi ur asen-d-yefki ara? Neγ tura waqila d anyir-iw i d-yettaken. Ssarameγ kan ad yili tfehmem tamsirt-agi”.
Yahia Yanes