I kemm tabrat-a a uletma Salima. D tabrat tamezwarut u d taneggarut ad am- in-aruɣ s teqbaylit. Ẓriɣ ad tt-tfehmeḍ, xas ur tessineḍ ara mliḥ taqbaylit, imi imeslayen-is kkan-d seg ul, d iḥulfan lqayen ; d ayen akka ay d nekk, imeṭṭawen-iw, tturugen-d kan s teqbaylit. Gummeɣ ad ttuɣ ass-nni, ass mi yi-d- tessawleḍ, tettḥellileḍ deg-i trennuḍ akken ad n-asseɣ ɣer tesdawit n Boumerdes, imi teqqlalḥeḍ tebɣiḍ ad aɣ-terreḍ tajmilt ɣef leqdic i d-nefkka am nekk am tselmadin-nniḍen i ibeddlen tasdawit; ruḥent ɣer tesdawiyin-nniḍen.
Akka ay d Salima: Tezga medden akk ttɣiḍin-tt; tḥemmel ad tent-ssefreḥ. Ihi, Ass-nni, ur d-rriɣ ara i teɣri-m, imi teẓri a uletma Salima akken i am-d-ssfehmeɣ, yeṭṭef-iyi uxeddim deg tesdawit n Tizi Uzzu, ulamek!. Yerna, d ayen i tjerrbeḍ ula d kemm. Abrid i nettawi seg Boumerdes ɣer uxxam yeǧǧa-d camma deg–nteɣ, aṭas i nebɛed, ihi ur teččeḥ ara fell-i. Ala a Salima ɛzizen, ziɣ, armi d ass-a, i yura weḥnin, akken ad d-rreɣ i teɣri-m, d lmektub i yebɣan akka.
Maca, ass-a, xas ussiɣ-, daɣen ur d-nemmlal ara, imi tɣabeḍ yakan! Tuɣeḍ abrid wernexli, teggriḍ-d gar yitran. Ɣer taggara, ssarameɣ tabrat-iw, tewweḍ-ikem-in, ṭṭes, steɛfu tura, ur akem- ntettu ara. Deg wulawen, teddreḍ, gar yitran tzedɣeḍ. Uqbel ad aken-ǧǧeɣ, ad am-d-alseɣ i wawal-nni, i akem-yessefraḥen, awal i tḥemmleḍ, ad t-tessleḍ seg yimi-w, yal tikkelt mi ara kem- ẓreɣ, qqareɣ–am-t-id “Salima, acḥal i tcebḥeḍ. Allen-im ttirriqent”. Tettarraḍ-iyi-d s lferḥ “Ah, s tidett-im a Faḍila, saḥit…”. A Salima, ihi akka, ar timlilit, ddunit annect tebɣu tekkit, meẓẓiyet. ad neqqel, ad d-nemmlil. Ur akem- ntettu ara, amekkan-im di rreḥma.
Fadhila Leroul