Littérature Kabyle : Contexte, poétique et enseignement d amaynut n Mohand Akli Salhi

Partager

Deg wussan-agi kan iɛeddan, i d-yeffeɣ ɣer ssuq udlis amaynut n umaru d umnadi akked uselmad n tesdawit Mass Mohand Akli Salhi, iwummi isemma “Littérature Kabyle : Contexte, poétique et ensignement”. D adlis wis setta ara d-yessuffeɣ umeskar-agi ɣef tsekla taqbaylit, d wayen i d as-d-yezzin. Yessuffeɣ-it-id ɣer tezrigin n Achab n Tizi Uzzu, yettnuzu s wazal n 450 DA. D adlis-nniḍen n tseklta taqbaylit, i d-yernan ɣer taffa, yellan yakan. Yebḍa ɣef kraḍ n yixfawen, yal ixef yebḍa s timmad-is d iḥricen. Dɣa deg yixef amenzu, iwummi isemma tamuɣli ɣef usatel (contexte) n tsekla taqbaylit, yewwi-d awal deg-s ɣef kraḍ n yiḥricen-agi: Asmenyet (renouveau) aseklan, timeɣnest d usefrari aseklan, tira n Belaid Ait Ali deg umezruy.

Ma d ixef wis sin, yewwi-d ɣef tmuɣli tudyizt (poétiques) n tsekla taqbaylit. Yebḍa ɣef semmus n yiḥricen, yemsetbaɛen akka: Tasekla taqbaylit yettwarun i ugrud, Aserwes di teqbaylit; allalen d tɣessa n userwes, Tudyizt n yismawen imaẓlayen n yiwudam n wungal aqbayli, Akaten n tmedyazt tamensayt n tmeṭṭut, Asenfali n lqerḥ ɣer Matoub Lounès. Ma d ixef aneggaru, isemma-as tamuɣli ɣef uselmed n tsekla taqbaylit, yebḍa-t ɣef sin yiḥricen-a: Asisten ɣef uselmed n tsekla taqbaylit d uselmed n tkatit n tmedyazt taqbaylit.

Ad d-nesmekti kan belli, Mass Salhi Mohand Akli, d aselmad deg ugezdu n tmaziɣt n tesdawit n Tizi Uzzu, d amnadi diɣ deg tsekla taqbaylit. Gar wayen i d-yessuffeɣ yakan, ad d-nebder; Asegzawal ameẓyan n tsekla di 2017, Kra n tsura i tɣuri n tsekla 1-2 di 2015…atg. Afud igerrzen i umeskar ɣer sdat.

A. A.

Partager