Ur nesɛi ara leḥsab unsib ɣef umḍan n leǧwamaɛ di Tmurt n Yiqbayliyen. Ulamma, i uɛraḍ kan akka, ma yella ugar n 3 000 n tuddar i yellan deg-s, ihi ad ilin ugar n 3 000 n leǧwamaɛ. Tikwal llant tuddar s sin n leǧwamaɛ, di lawan ideg timesgidiwin ttenqasent rennunt, ama s ufus n umdan neɣ n zzman. Aredmani, ayen i d-yeḍḥan d ttbut akka tura, d annerni i ttnernin leǧwamaɛ deg ukuẓ n tɣemmar n Tmurt n Yiqbayliyen, iseggasen-a ineggura.
Simmal yettwaway Uqbayli s tesnakta i as-d-yennan ilaq ad tesɛuḍ taflest s teɛrabt, simmal tɛerreq teqbaylit, iderrem yidles, yettɣunzu-aɣ Bab n yigenwan. Rnu ɣer-s, deg waṭas n temnaḍin, mačči d lḥukuma i yettxellisen lebni n leǧwamaɛ-a am wakken yella lḥal tallit iɛeddan mi yebda usenfar n ddula, maca d imezdaɣ s timmad-nsen i ixeddmen tabzert, jemmɛen-d azal n tedrimt swayes ara ibedd. Amedya n tɣiwant n Ayt Smaɛel, deg Unẓul-asamar n Bgayet, ideg ttwabnan, ayyuren-a ineggura, kraḍ n leǧwamaɛ.
Di taddart n Ayt Tɛisiwt yella yekker umennuɣ gar snat n tamiwin armi tekker terbaɛt i lebni n wis sin, amzun mačči d yiwen n ubrid i ḍefren. Daɣen, di tɣiwant tanaragt n Tsexriwt, di taddart n Ayt Idris, ussan-a kan i yeldi yiwen n lǧamaɛ d amaynut. «Akken yebɣu yili, yewwi-d ad d-tres i uskasi taluft n lebni n leǧwamaɛ di lawan ideg yir tasnakta tɣemmi, rnu-as imezdaɣ i yettnernin di tuddar. Ma yerra yiwen iman-is d wakal-is d leǧwamaɛ, ulac amḍiq ara d-yaf xir i usemres n teflest-is», i d-yenna yiwen n umezdaɣ n Ayt Smaɛel.
M. K.