Mbeɛd ismektiyen n Tefsut n tmanyin d Tefsut taberkant i d-yellan deg wussan iɛeddan, i d-yettuɣalen yal mi ara d-yeḥḍer waggur n yebrir, yella-d diɣen ussan-a usmekti n yiwen wazemz-nniḍen icudden dima ɣer tefsut d umennuɣ ɣef tmaziɣt, wagi d azemz n 19 maggu 1981.
Yella-d usmekti-ines deg kra n tamiwin n Bgayet am Cemmini, Sidi Ɛic d temdint n Bgayet s yisaragen d tejmilin i yuɣalen ladɣa i wid yettwaṭṭfen ɣer leḥbus lawan-nni, d usiweḍ n tmella i wid yewwḍen leɛfu n Rebbi. Azmez-a, ad yeqqim deg umezruy n umennuɣ ɣef tmaziɣt, ma neẓra azal yesɛa deg tikli i d-telḥa timmeɣnest ar ass-a, ɛlaḥsab n umeslay n wid yeddren ineḍruyen-a. Dɣa deg Uxxam n yilmeẓyen n Cemmini, tella-d ass n 21 maggu yezrin tafilt tagnennayt (table ronde) i d-yessemlalen 8 n wudmawen yekkin di tmesbaniyin am Tari Aziz, Terki Zoubir d wiyaḍ ?
Mmeslayen-d deg-s ɣef usuter agejdan n tikli-a, d asuter i yerzan lebni n tesdawit deg wakal n Bgayet seld mi yella wawway-ines ɣer temnaḍt n Jijel, akked usuter n tukci n wazal i tutlayt n yimaziɣen. Wwin-d awal daɣen ɣef yimeddukkal-nsen yettwaṭṭfen am Abdelaziz Merabet, Abdelkader Guijdou, Rachid Adalou.. atg. Ass n 19 maggu 1981, tella d tuffɣa n ugdud aqbayli ɣer yiberdan deg temnaḍt n Ssumam, d tuffɣa meqqren mbeɛd tin n Tefsut n yimaziɣen deg yebrir 1980. Ffɣen-d yisnawiyen, iselmaden, ixeddamen d wid ur nxeddem ara, tettwasuddes akken ilaq, d ayen i tt-yeǧǧan ad tekcem deg umezruy.
D tikli i d-heggan yiseqquma n yisnawiyen akked yigensasen inmula n Bgayet. Maca imasayen n tallit-nni, fkan lamer i yiɣallen n laman am tannumi akken ad qerɛen imesbaniyen yessuturen azref-nsen, d ayen i d-yeglan s tyitiwin d uḥbas n waṭas n yimeɣnasen iwumi ḥekmen gar 6 wagguren ar 5 n yiseggasen. D ayen i d-yewwin syin ɣer sdat aṭas n temliliyin deg yakk tamurt n Leqbayel akken ad iɛiwed udabu tamuɣli ɣef temsalt n tmaziɣt, mi ẓran d akken ɣef lḥeq i d-ffɣen, ɣef wayla-nsen i nudan, d ameslay n tmeslayt-nsen i bɣan d uselmed-ines di lakulat i yigerdan i d-yettlalen yis-s.
Kh. A.