Tafaska tadelsant tamenzut Mohand Said Amlikech d tin yebdan iḍelli deg temdint n Tezmalt s lmendad n tdukli tadelsant irefden isem n umedyaz-a akked yimḍebbren n tɣiwant n Tezmalt, Boudjelli d At Mlikech. Azal n 20 n tdukliwin tidelsanin i d-yefkan afus n tallelt iwakken tafaska yecban ta ad d-tefk udem ara icebbḥen abrid yuɣ Mohand Said Amlikech deg umennuɣ-is mgal anekcam Arumi ɣer tama n Boubeghla, d wayen yexdem i yidles Amaziɣ.
Ilmend n tfaska-a, yettuhegga-d yiwen n wahil d amerkanti anda aṭas n yisaragen ara d-yilin ɣef tudert n Mohand Said Amlikech, d wayen icudden akk ɣer tmedyazt-is akked umezruy n At Mlikech.
Am wakken daɣ ara tili d tagnit anda ara d-yili wawal ɣef udlis yerzan tudert d umecwar yuɣ Mohand Said Amlikech, iwakken ad yili d azamul i tsutwin i d-iteddun.
Iwulem ad d-nini dakken tafaska i d-thegga tiddukla-agi d tin ara d-yessukksen seg tatut amezruy lqayen n temnaḍt n At Mlikech d wayen yexdem yiwen seg warraw-is. S tidet, tanekra ɣer cɣel yecban wa yessutur-d aṭas n ttawilat, maca ma yezwar lebɣi d awezɣi ur ttawḍen ara yiɛeggalen n tiddukla-a ɣer yiswi-nsen.
S. M