Tlata seg-sen d tilawin, ɣeṛqent mi ṛuḥent ad selkent mmi-s n yiwet seg-sent yesɛan di leɛmeṛ-is ḥdac n yiseggasen, di taggara yečča-ten lebḥeṛ di ṛebɛa yid-sen, am uqcic-nni, am tlawin-nni. Tawaɣit-a i yessergagin s waṭas imdanen ladɣa imezdaɣ n temdint n Leqṣer imi n dinna twacult-agi iɣeṛqen s lekmal-is, teḍṛa-d deg cceṭ n Cap Sigli ass n lḥed 15 deg waggur n yulyu ideg nella. Ɛlaḥsab n ulɣu i d-tessufeɣ tenmehla n yiɣallen n usellek n Bgayet : « argaz n yiwet seg tlawin-a iɣeṛqen, daɣen d ababat n uqcic-nni, yeɛṛeḍ akken ad ten-id- isellek maca ur yessaweḍ ara ». Ɣas ma ɣer taggara gren-d iman-nsen yiɣallen n usellek, maca ur ssawḍen ara ad ɛetqen tiṛwiḥin-nsen, imi ala argaz-nni i yeddren ma d tilawin-nni akked uqcic-nni tewwi-ten tmettant. Yiwen n wass kan i iɛeddan ɣef twaɣit yeḍṛan deg cceṭ n Cap Sigli mi d-terna tayeḍ deg cceṭ n Ucerriṭ ideg ur mesmuḥ ara lɛum imi ulac deg-s iɣallen n usellek. Cceṭ-a i d-yezgan di tɣiwant n Weqas, mmuten deg-s ass-nni n letnayen 16 yulyu tlata n yimdanen. S snat twuɣa-ya yeḍṛan di Cap Sigli akked Weqas, yewweḍ umḍan n wid yečča lebḥer di Bgayet segmi i tebda tsemhuyt n unebdu ɣer ɛecṛa n yimdanen. Aya, mebla ma nettu ur d-nbedder ara yiwen seg yiḥewwasen yellan deg cceṭ n Beni Ksila yeɛṛeq seg ass wis sin n waggur n yulyu ar ass-a ur d-iban lateṛ-is, ma yella mačči d aɣṛaq i yeɣṛeq !
M. C.