« D tikkelt tamenzut ara xellseɣ 17000 n yidinaren deg yiwen n ukraḍyur. Cukkeɣ ahat nwan belli acu n lluzin i kesbeɣ, ladɣa ur ksibeɣ ara kra ttawilat ifazen ara yesserɣen ugar.» D ayen i aɣ-d-yenna Kamel, yiwen n umezdaɣ yerfan ɣef wayen i yettidiren tikkelt-a.
Akka ihi, awal yuzzel ittezzi deg wussan-a ɣef tfaṭurin n lgaz d trisiti i d-yersen ɣef yimdanen d taɛkemt meqqren, imi tabzert mačči d tin xfifen, tin akken iwumi ara yizmir uxeddam. Imezwura i d-yekkren i wakken ad d-beggnen lɣiḍ-nsen d imezdaɣ n Haizer, i ixedmen yiwet n tmesbanit anda suɣen, ɛeggḍen mgal ayen akka i d-yersen fell-asen ɣas ulamma imḍebbren, nnan-d d akken ur d-tettili kra n tmerna deg ssuma n trisiti. Maca, tifaṭurin beggnent-d ayen-nniḍen, imi kkant nnig n tezmert n yimezdaɣ. At Haizer, ssutren aɛiwed n tmuɣli deg tfaṭurin-a, i d-yusan deg yiwet n tallit anda amdan yesseḥzab amek ara iqabel ameṣruf n waggur n Remḍan i d-yellan akka ɣef tewwura. Tabzert-a, tḥuza akk timnaḍin n twilayt, ladɣa deg Beclul anda imezdaɣ dehcen mi ṭṭfen tifaṭurin. « Ulac win iwumi i d-ssutren ddaw n umelyun n ssantim, » i aɣ d-yenna Rabah, yiwen n umezdaɣ n temnaḍt-a. Deg Tewrirt Tazeggaɣt, taluft tɛedda tilas, imi tifaṭurin ssuzfent tixerḍin n yimdanen. Tuget n wid i d-nemmuger, d wid yeccektayen ɣef leɣla, imi tabzert tejba nnig n sin n yimelyunen, mi akken ixeddamen ttrajun tajernant-nsen s ccuq. « Dagi di temnaḍt-a n Beclul, imḍebbren n Sonelgaz ttaǧǧan kan 15 n wussan-nni yellan d azref i wakken ad ixelles umezdaɣ. Ass wis 16, ad d-jbun fell-aɣ ɣer yixxamen, ma yella ur txellseḍ ara, ad ak-gezmen trisiti. Tura akka, ur neẓri ma yella ad nexdem ɣef warraw-nneɣ, neɣ ɣef trisiti, ma yal akraḍyur ad nxelles nnig n sin n yimelyunen ? “ Ɣer tama n taddart-a, anda kra n yimdanen sɛan akka lebyur i ssexdamen i tebḥirin-nsen, tafaṭurt mačči d tin ara iwali umdan: ẓẓayet ! Di temnaḍin-a, ulac s ddaw n tlata n yimelyunen, ayen yesxesren nniya i waṭas n yimdanen yebɣan akka ad d-ssekren kra n yisekla deg tferkiwin-nsen. Ulamma, yella wawal-nni n umedyaz anda yeqqar « Tettban-d lqima n tafat mi ara ken-yewwet wugur n ṭṭlam3, maca mi ara d-taweḍ tallit ara yessuzfen lǧib, ad yeɛreq leḥsab.
M. Smail