Deg useggas n 1958 tegzem-it di rray tadbelt n Fransa deg lmaḥel-nni tewwi kra n tewaculin deg yimkwan yemkalafen, tebna-asen kra deg yiɛecciwen deg yiwen n umakan iwumi semman “Amḍiq”. Γef teɣzi n 50 n yiseggasen, azal-nsent 146 n twaculin, i mazal ttidirent am wakken deg yiseggasen n 1950, seg lixsas yellan deg yiḥricen yemgarraden, ama deg tmezduɣt, deg wamen, … Aya ɣas akken taɣiwant teɛreḍ ad taf tifrat i uɣbel-agi iwumi tga ahil n tmezduɣt n ssenf n social. Maca, aya dayen ur d-nelli ara, imi kkren-d kra n yimdanen, suturen seg ddula ad asen-d-rren akal-a i sen-tekkes Fransa s ẓẓur. Tamsalt-a ɛlaḥsab imeqqranen n tama-ya tettwafra deg tlalit n umenkcam arumi i yefkan adrim i yimawllan n wakal, ɣas akken ulac ttbut i d-yettbegginen aya. Ayen yeswhamen wigi i isemman iman-nsen d imawlan n wakal-a ur ugin ara imezdaɣ n yiɛaciwen-a ad bnun ixxamen-nniḍen ɣef wakkal agi i d-qqaren nsen, lameɛna ugin-as i ddula ad tebnu lbaṭimat din. Ad d-nerr lwelha belli taɣiwent n M’kira, d yiwet n tɣiwant tigelilt deg lwilaya n Tizi Wezzu, ur nezmir ara ad d-txelles akal-a i uɣallen d aɛewwiq zdat n usbeddi n usenfar-agi n usewjed n 146 n tmezduɣin. Ilmend n waya, imḍebbren n tɣiwant gezzmen-tt di rray ad sbedden ahil-a n tmezduɣin deg umkan-nniḍen, maca, ṭaqqa n yimezdaɣ n “Umḍiq” ugin ad ruḥen syin, imi llan deg-sen wid i ixedmen timzduɣin akked tḥunna.Taswiɛt-a d tin yessenṭaren s waṭas ṭaqqa n yimezdaɣ igellilen ur nezmir ara ad sfaydin ulamma s lemɛawna n ddula n 70 melyun n sentim, imi ur sɛin ara lekwaɣeḍ n wakal. Liḥalla ideg ttidirent twaculin-a d tin iseɛben deg yiɛecciwen imi ur sliken i fad d uzɣal u nebdu, ur sliken i tiqit d uxmir n ccetwa. Aya s sebba n yiɛewwiqen n yimdanen ur neǧǧi taɣiwant ad texdem ahil n temezduɣt ara yessufɣen tiwaculin deg lḥif ideg ttidirent deg wazal n uzgen n lqern.
Dalila I.