Kra kkant tmesbaniyin yeḍran di Libya i d-yeglan s tmettant d ujraḥ n yimeyyaten seg yilmeẓyen, lwelha n ttawilat n yisallen n tmura n ddunit ladγa tilibizyuwat, terra γer Lqeddafi d leḥkem-is arebrab ur nesεi lmital. Aṭas i iwehhmen seg yimeslayen-is, ideg yessawal γer usenger n ugdud i yeḥkem s yiγil i wazal n 42 n yiseggasen ; icuba imesbaniyen γer yiγerdayen, yettwali d lḥeqq fell-as ad ten-yessenger. Mačči kan d aya, Agellid n yigelliden n Tefriqt (am akken i yettwali iman-is) am netta am mmi-s, yal tikelt ideg ara d-mmeslayen di tilibizyu, qqaren-d : « Imesbaniyen i d-yettefγen γer yiberdan ur llin ara di lγerḍ-nsen imi ččan tikaciyin ! ». Deg yiwen n umaṭṭaf n tilibizyu, xedmen tidwilt γef usentel n « tmexlelt n Lqeddafi », anda i d-εeṛḍen yiwen n upsikyaṭṛ, yenna γef temsalt-a n tkaciyin : « Aṭṭan n Lqeddafi d lpaṛanuya, wid i yuḍnen lpaṛanuya di leεwayed-nsen ḥemmlen ad rren ayen xeddmen nutni γef wiyiḍ ; akken daγen ula d tamsalt n tkaciyin iγef yessaget awal, netta ma tmuqleḍ γur-s amek i yettmeslay neγ ula d llebsa-s d lefεayel-is s umata yettbin fell-as itett kra n uεeqqaṛ ama d tikaciyin neγ d kra n ladṛug-nniḍen ».
Agdud alibi ur nuklal lhem, aṭas i yeṣbeṛ i tmexlelt n ubhim-a i yuγalen fell-as d lḥakem. I teγzi n leḥkem-is, Aqeṛṛu n Tegrewla n Lfatiḥ Alεaḍim(am akken i isemma iman-is) seg wasmi i yexdem akudiṭa deg useggas n 1969 armi d ass-a, netta d asxeṛweḍ d uḥettem n tiktiwin-is ur nesεi lmeεna γef yimdanen : yesbedd leḥkem n leεṛuc i yettwali yif win n yikabaren, yura tirga-s d wayen akk i yettxayal deg udlis umi isemma Alkitab Al-axḍeṛ neγ Adlis Azegzaw icuba-t γer Leqṛan neγ kteṛ, s yes-s i yesselḥay lumuṛ n tudert di Libya. Ifuṛes tagnit anda i yeεma leğnas s uṣurdi i d-yeggar deg lpiṭṛul d lgaz, wama yesban-d yakan tuccar-is deg yiseggasen iεeddan imi yella yettsanad imussuyen irebraben yerna yesseγli-d yiwet n tmesrifegt n Marikan deg umkan umi qqaṛen Lockerbie (tamnaḍt n Ecosse, Briṭaniya)deg useggas n 1988, ayen i yas-d yeglan s lεuqubat n usqamu n laman n ugraw n leğnas yedduklen. Segmi i as-ksen lεuqubat deg useggas n 2003, yuγal d ilelli, yesbedd sleṭna-s akken ilaq netta akked warraw-is, idrimen llan, wezzeε kan teṛnuḍ γas ṛṛay yetlef ! Ma d agdud meskin yerra-yas tawenza-s γer deffir s tiktiwin-is yeffγen i lwaqeε d lmeεqul ; d tekmamt i yerra γef tlelliyin d tugdut :ur yeğği imeγnasen n tmaziγt la wid n yizerfan n umdan neγ at icumar, wa yenγa-t wa yeḥbes-it wa yetlef-it γer tmura n lbeṛṛani, yenγa azal n 1200 n yimeḥbas di Benghazi deg useggas n 1996. Aḥun Ṛebbi tusa-d tegrewla n 17 di fuṛaṛ, d nettat kan i d-tagnit iwulmen akken ad d-suffγen iman-sen yilibiyen seg ṭlam, γas ẓṛan aya ad yeglu s waṭas n yiseflan.
Mokrane Chikhi