Deg yiwen usarag i yexdem Pr Slimane Hachi i lmend n umulli wis 31 n tmettant Mulud Mɛemmeri, deg Uxxam n yidles n Tizi Uzzu, ass-nni n ttlata yezrin, yenna-d : ‘’Amahil n Mulud Mɛemmri, yerza s umata aseḥbiber ɣef tgemmi s yinadiyen-is akked leqdicat-is. Aya, yessaweḍ-it, dɣa, ad d-yessifrir ayen yellan yedreg deg tama-nni n Timimun (leqdicat n tfellaḥt, tamedyazt, ansayen…). Ladɣa Ahellil i yuɣalen yekcem ɣer tgemmi tadelsant tamensayt n umaḍal deg UNESCO’’.
Ikemmel Pr Hachi deg wawal-is : ‘’Yebda leqdic-is deg yiseggasen n 1960 akked 1970. D netta i d-ineǧǧren abrid-agi n useḥbiber ɣef tgemmi akked wiyaḍ. Ass-a, ddunit merra tedda deg lǧerras. D Lmulud At Mɛemmer i d ababat n telsasnet (anthropologie) deg Lezzayer akked Tefriq Ugafa s umata. Tura, tuɣal tgemmi tadelsant tamensayt d amennuɣ n talsa s umata armi yewweḍ ireṣṣa usiḥbiber ɣef tgemmi deg umtawa (convention) n 2003 i d-tessuffeɣ l’UNESCO ɣef tgemmi tadelsant tamensayt (immateriel). Ilaq ad nẓer d akken aḥareb ɣef tmagit, icudd daɣen ɣer tgemmi’’.
H. M.